Skessuhorn:

Aukin bjartsýni á World Travel Market í London

13. nóvember 2009

Íslenskir ferðaþjónustuaðilar voru sem fyrr meðal þátttakenda á hinni árlegu ferðasýningu World Travel Market sem lauk í London í gær. Þetta er ein stærsta ferðasýning í heimi. “Vel tókst til að vanda og íslensku fyrirtækin fundu fyrir enn meiri áhuga en síðasta ár á ferðum til landsins. Viðmælendur fulltrúa Ferðamálastofu voru sammála um að það gætti heldur meiri bjartsýni um næsta ár samanborið við raunniðurstöðu þessa árs,” segir í frétt frá Ferðamálastofu. Sem fyrr sá Ferðamálastofa um undirbúning og skipulagningu fyrir Íslands hönd en íslensku þátttakendurnir voru 14 talsins. Líkt og fyrri ár var sýningarsvæðið sett upp í samstarfi við aðrar Norðurlandaþjóðir.

World Travel Market er mikil að vöxtum en hún er haldin í glæsilegri sýningahöll, ExCel í Docklands, austast í London. Sýningarbásarnir eru um 700 talsins og þarna koma saman um 4.900 sýnendur frá öllum heimshornum. Sýningin stendur yfir í fjóra daga. Fyrstu sýningardagana er einungis fagaðilum í viðskiptaerindum veittur aðgangur en seinni dagana er einnig opið fyrir almenning.